Autoritetet shëndetësore në Kanada kanë konfirmuar një rast pozitiv me Hantavirus tek një nga pasagjerët e anijes turistike MC Hondius, ku u raportua shpërthimi i virusit.
Sipas Zyrtares Provinciale të Shëndetit në British Columbia, Dr. Bonnie Henry, personi i infektuar është nga Yukon dhe kishte shfaqur simptoma të lehta dy ditë më parë, përfshirë ethe dhe dhimbje koke.
Katër shtetas kanadezë që ndodheshin në anijen turistike mbërritën në Victoria më 10 maj dhe u vendosën në karantinë për të paktën 21 ditë. Dy persona të tjerë që kishin udhëtuar më herët drejt Kanadasë ndodhen në izolim në Ontario.
Edhe pse vetëm një person ka rezultuar pozitiv deri tani, tre nga katër personat në karantinë në ishullin Vancouver po monitorohen aktualisht në spital.
Sipas raportimeve, tre persona që ndodheshin në bordin e anijes turistike kanë humbur jetën.
Hantavirus është një virus i rrallë që zakonisht transmetohet përmes kontaktit me brejtësit ose materialeve të kontaminuara prej tyre dhe mund të shkaktojë probleme serioze respiratore.
