Autoritetet iraniane kanë njoftuar se forcat e tyre kanë ndaluar kalimin e katër anijeve në Ngushticën e Hormuzit gjatë 24 orëve të fundit, ndërsa Agjencia Britanike për Operacionet Tregtare Detare (UKMTO) ka raportuar një incident që përfshin tankerë dhe forca ushtarake në Gjirin e Omanit.
Sipas Gardës Revolucionare të Iranit, ndërhyrja u shoqërua me të shtëna paralajmëruese ndaj anijeve. Deri në publikimin e njoftimit, autoritetet iraniane nuk kanë bërë të ditur identitetin, flamurin apo destinacionin e anijeve të përfshira.
Nga ana tjetër, UKMTO konfirmoi se ka marrë informacion për një incident në Gjirin e Omanit që përfshin tankerë dhe forca ushtarake. Agjencia nuk ka publikuar detaje të mëtejshme mbi vendndodhjen e saktë, anijet e përfshira apo rrethanat e ngjarjes.
Ngushtica e Hormuzit mbetet një nga korridoret detare më të rëndësishme për transportin ndërkombëtar të energjisë, ndërsa zhvillimet e fundit kanë rritur shqetësimet për sigurinë e lundrimit në rajon.
Deri në publikimin e këtij materiali, informacionet e bëra publike nga autoritetet iraniane dhe UKMTO nuk janë shoqëruar me të dhëna të plota mbi incidentet, ndërsa nuk ka pasur reagime të tjera zyrtare nga palët e përfshira.
