Një ngjarje e rëndë është shënuar ditën e sotme në Tiranë, ku një punëtor 64-vjeçar ka humbur jetën pasi ka rënë nga lartësia gjatë punimeve në një kantier ndërtimi në zonën e Paskuqanit.
Sipas informacionit zyrtar, viktima me iniciale H. P. ishte duke kryer punime hidraulike rreth orës 10:30, kur dyshohet se ka rënë aksidentalisht nga lartësia, duke pësuar dëmtime fatale. Si pasojë e plagëve të marra, ai ka ndërruar jetë në vendngjarje.
Pas hetimeve të para, policia ka arrestuar në flagrancë administratorin e firmës nënkontraktore, shtetasin A. M., 61 vjeç, nën dyshimet për shkelje të rregullave të sigurisë në punë. Arrestimi u krye rreth orës 18:00 nga specialistët për Hetimin e Krimeve në Komisariatin e Policisë Nr. 5.
Autoritetet po vijojnë hetimet për të sqaruar plotësisht rrethanat e ngjarjes dhe për të përcaktuar përgjegjësitë ligjore. Materialet procedurale i janë referuar Prokurorisë së Tiranës për veprime të mëtejshme.
