Dy vite pas premtimit elektoral për gazifikimin e Korçës, realiteti në qytet mbetet i pandryshuar. Në lagjet e qytetit, tymi i oxhaqeve dhe sobat me dru vazhdojnë të jenë e vetmja mënyrë ngrohjeje për qindra familje, ndërsa projekti i shumëpërfolur i gazit natyror nuk ka kaluar ende fazën e dokumenteve.
Gjatë fushatës zgjedhore, kryebashkiaku Sotiraq Filo dhe kryeministri Edi Rama garantuan se Korça do të ishte qyteti i parë i gazifikuar në Shqipëri, duke premtuar ajër më të pastër dhe kosto më të ulëta për familjet. U fol për “hapjen e çelësit të gazit” dhe u përmend fundi i vitit 2026 si afat realizimi.
Sot, në terren, banorët thonë se nuk kanë asnjë informacion konkret për ecurinë e projektit. Ngrohja vazhdon me dru, ndërsa kostot janë rritur ndjeshëm. Një metër kub dru shkon deri në 55 mijë lekë të vjetra dhe për shumë familje nevojiten mbi 10 metra për të përballuar dimrin.
Nga ana institucionale, Bashkia Korçë pranon se projekti ndodhet ende në fazën e parafizibilitetit. Edhe pse studimi teknik është përfunduar, mungon ende marrëveshja përfundimtare mes qeverisë shqiptare dhe palës azerbajxhanase, çka bllokon çdo hap konkret në terren.
Sipas planit të investimeve të Albgaz-it, puna për gazifikimin pritet të nisë në vitin 2025 dhe të përfundojë në vitin 2027. Kostoja totale e projektit parashikohet mbi 20 milionë euro, ku pjesa më e madhe e barrës financiare bie mbi qytetarët, të cilët duhet të mbulojnë shpenzimet për lidhjet dhe instalimet e brendshme.
Ndërkohë, edhe institucionet publike si shkollat, kopshtet dhe objektet kulturore nuk mund të furnizohen me gaz pa fonde shtesë nga bashkia, gjë që rrezikon ta shtyjë edhe më tej funksionimin real të rrjetit.
Në përfundim, gazifikimi i Korçës mbetet një projekt i shkruar në plane dhe premtime, por jo në jetën e përditshme të qytetarëve. Deri atëherë, dimri për korçarët vazhdon të matet me dru, tym dhe shpenzime të larta, ndërsa premtimi për ngrohje moderne mbetet ende i pambajtur.
