Gazetari Basir Çollaku ka publikuar një analizë ku ngre akuza dhe pikëpyetje lidhur me hetimet e zhvilluara për tenderat e AKSHI dhe vendimet e fundit gjyqësore ndaj ish-drejtueses së institucionit, Mirlinda Karçanaj.
Sipas tij, në përgjimet ambientale të dosjes hetimore përmendet edhe emri i Linda Rama, ndërsa ngrihen dyshime se mund të ketë pasur përpjekje për të kufizuar zgjerimin e hetimeve drejt familjes së kryeministrit.
Çollaku komenton gjithashtu vendimin e fundit të Gjykatës së Lartë për ndryshimin e masës së sigurisë ndaj Mirlinda Karçanaj nga arrest në “detyrim paraqitjeje”, duke aluduar për ndikime dhe presione politike.
Në shkrimin e tij, gazetari përmend edhe emra të tjerë të lidhur me dosjen, mes tyre Ergys Agasi dhe Belinda Balluku.
Ai shtron një sërë pyetjesh publike mbi ecurinë e hetimeve të SPAK, duke sugjeruar se institucioni mund të jetë duke vepruar me ritme të ngadalta në çështje që lidhen me nivelet më të larta të pushtetit.
Deri tani nuk ka reagim zyrtar nga Linda Rama, Edi Rama, SPAK apo personat e tjerë të përmendur në material lidhur me pretendimet e gazetarit.
Sqarim: Pretendimet e ngritura në këtë material janë deklarime dhe analiza mediatike. Personat e përmendur prezumohen të pafajshëm deri në një vendim gjyqësor të formës së prerë.
