Sekretari i Përgjithshëm i Partia Demokratike e Shqipërisë, Flamur Noka, ka reaguar lidhur me refuzimin e dosjes së kandidimit të Ervin Salianji për postin e kryetarit të partisë.
Në një deklaratë për mediat, Noka theksoi se procesi i kandidimeve ka qenë i hapur për një periudhë njëmujore, por vetëm për ata që përmbushin kriteret statutore të Partisë Demokratike.
“Një muaj ka pasur afat për të aplikuar çdo kush, por çdo anëtar që plotëson kriteret. Dyert e PD-së janë të hapura, por jo për ‘Gysin’. Kur të hapet gara për administratorin e bizneseve të Gysit, atëherë flasim për kritere të tjera”, u shpreh ai.
Sipas Nokës, gara për drejtimin e partisë është një proces i brendshëm politik dhe nuk mund të përfshijë persona që, sipas tij, nuk përmbushin standardet e përcaktuara nga strukturat e partisë.
Ai solli në vëmendje edhe kandidaturën e Mereme Selës, duke theksuar se ajo është anëtare e Partisë Demokratike dhe se vlerësimi për plotësimin e kritereve i takon institucioneve përkatëse brenda partisë.
Refuzimi i kandidaturës së Salianjit ka shkaktuar debat në skenën politike, ndërsa vetë ish-deputeti ka paralajmëruar se do të ndjekë rrugë alternative për dorëzimin e dokumentacionit dhe nuk do ta njohë procesin nëse përjashtohet nga gara.
Zhvillimet vijnë në një moment të tensionuar për zgjedhjen e kreut të ri të Partia Demokratike e Shqipërisë, ku pritet përballja mes kandidaturave dhe vendimmarrja e strukturave drejtuese të partisë.
