Ish-ministri i Mbrojtjes, Fatmir Mediu, është paraqitur këtë të mërkurë në ambientet e Gjykatës së Posaçme, në kuadër të seancës së radhës gjyqësore për çështjen e masakrës së Gërdecit.
Prokuroria e Posaçme Antikorrupsion ka depozituar prova të reja në dosjen në ngarkim të Mediut, të cilat do të përdoren në vijimin e procesit gjyqësor. Mes tyre përfshihet edhe një shkresë zyrtare, konkretisht një faks i dërguar nga zyra e ish-ministrit të Drejtësisë drejt Ministrisë së Mbrojtjes, që lidhet me hapjen e fabrikës së demontimit të armëve në Gërdec.
Në këtë dokument, sipas SPAK, figuron një shënim i posaçëm me emrin e Shkëlzen Berishës, djalit të ish-kryeministrit të kohës, çka për prokurorët përbën element të rëndësishëm për hetimin e zinxhirit të vendimmarrjes.
Po ashtu, Prokuroria ka kërkuar që të merret në pyetje edhe Anjola Agolli, ish-sekretare e ministrit të Drejtësisë. Ajo ka dëshmuar më herët për ekzistencën dhe përmbajtjen e dokumentit që autorizonte hapjen e fabrikës së demontimit, ku sipas saj ishte shënuar emri i Shkëlzen Berishës.
Fatmir Mediu akuzohet për shpërdorim detyre, pasi sipas SPAK, gjatë ushtrimit të funksionit të tij janë shkelur procedurat ligjore për ngritjen e fabrikës së demontimit të municioneve, e cila u ndërtua pranë një zone të banuar, në kundërshtim me rregullat e sigurisë.
Ish-ministri i ka mohuar vazhdimisht akuzat, duke kundërshtuar edhe gjetjet e ekspertëve të përfshirë në proces. Gjyqi ndaj tij vijon prej prillit të vitit 2023.
Rihapja e çështjes penale ndaj Mediut u bë pas më shumë se 12 vitesh, me nismën e familjarëve të viktimave të shpërthimit tragjik të 15 marsit 2008 në Gërdec, ku humbën jetën 26 persona dhe qindra të tjerë mbetën të plagosur.
