Në seancën e sotme në Gjykatën e Posaçme për dosjen “Partizani”, avokati i Sali Berishës, Genc Gjokutaj, kërkoi që kryeministri Edi Rama të thirret dhe të pyetet si dëshmitar.
Sipas mbrojtjes, Rama është dëshmitar kyç, pasi ka ndryshuar destinacionin e pronës, element që lidhet drejtpërdrejt me objektin e hetimit. Avokatët kërkuan gjithashtu që të administrohet si provë një DVD me fjalimin e Ramës në Asamblenë e PS në prill 2022.
Gjatë seancës, mbrojtja kundërshtoi akuzat duke u mbështetur në tre pika kryesore:
- SPAK ka tejkaluar kompetencat, pasi vlerësimi i VKM-ve dhe politikave qeveritare i përket Gjykatës Kushtetuese.
- Mungon fakti penal, pasi nuk ka veprime konkrete penale të atribuueshme Berishës dhe akuzat mbështeten në deduksione.
- Procesi është ndikuar politikisht, për shkak të deklaratave publike të kryeministrit dhe faktorëve ndërkombëtarë.
Seanca pritet të vijojë me shqyrtimin e kërkesave për dëshmitarë dhe prova.
