Kryeministri Edi Rama ka zhvilluar një takim me kryebashkiakët, ku ka dhënë një sërë porosish që lidhen me pastrimin e territorit, menaxhimin e emergjencave dhe procesin e legalizimeve.
Në fokus të diskutimeve ishte ngritja e një task-force të përbashkët mes qeverisë dhe pushtetit vendor për përmirësimin e menaxhimit të mbetjeve. Sipas Ramës, problematika e mbeturinave mbetet e theksuar, sidomos gjatë sezonit turistik dhe në zonat jashtë qendrave urbane.
Ai theksoi se do të hartohet një plan i detajuar që do të përfshijë masa afatshkurtra, afatmesme dhe afatgjata, duke nisur nga sensibilizimi i qytetarëve deri te ndërhyrjet konkrete në terren. Ministri i Mjedisit dhe ai i Pushtetit Vendor janë ngarkuar për koordinimin e këtij procesi.
Një tjetër prioritet i theksuar nga kreu i qeverisë ishte forcimi i kapaciteteve për emergjencat civile në nivel vendor, përmes bashkëpunimit mes institucioneve përgjegjëse.
Rama u ndal gjithashtu edhe te procesi i legalizimeve, duke kërkuar që bashkitë, në bashkëpunim me Kadastrën, të hartojnë plane prioritare për përshpejtimin dhe organizimin më të mirë të këtij procesi. Ai sugjeroi edhe hapjen e zyrave të posaçme për ndihmë juridike në funksion të qytetarëve që janë pjesë e këtij procesi.
Në përfundim, kryeministri u bëri thirrje kryebashkiakëve që këto prioritete të zbatohen sa më shpejt dhe me efikasitet në të gjithë territorin.
