Kryeministri i Shqipërisë, Edi Rama, ka reaguar ndaj kritikave për procesin e integrimit europian, duke ia atribuar përgjegjësinë opozitës për klimën negative që, sipas tij, po ndikon në perceptimin e Bashkimi Evropian ndaj vendit.
Në një komunikim publik, Rama u shpreh se debati politik në Shqipëri është degraduar, duke u fokusuar më shumë në përplasje dhe akuza sesa në çështjet reale që lidhen me zhvillimin e vendit dhe integrimin.
Ai theksoi se, pavarësisht problematikave të pranuara, procesi i negociatave me BE-në vazhdon dhe nuk është i bllokuar, siç pretendohet nga kundërshtarët politikë. Sipas tij, “punët e Shqipërisë janë në vijë” dhe progresi po vijon në mënyrë të qëndrueshme.
Megjithatë, deklaratat e kryeministrit vijnë në një moment kur janë shtuar debatet mbi luftën kundër korrupsionit dhe hetimet e SPAK, ku disa ish-zyrtarë të lartë janë përfshirë në procese gjyqësore.
Nga ana tjetër, kritikat politike theksojnë se procesi i integrimit lidhet ngushtë me standardet e sundimit të ligjit, funksionimin e institucioneve dhe rezultatet konkrete në luftën kundër korrupsionit, fusha që konsiderohen kyçe nga BE-ja.
Në këtë klimë përplasjesh politike, mbetet për t’u parë nëse Shqipëria do të arrijë të avancojë në hapjen dhe mbylljen e kapitujve negociues, ndërsa pritshmëritë për progres konkret mbeten të larta si nga partnerët ndërkombëtarë, ashtu edhe nga opinioni publik.
