Karabinierët në Raguzë kanë arrestuar një shtetas shqiptar 29 vjeç, i akuzuar për dhunë në familje, pas një ndërhyrjeje urgjente në banesën që ai ndante me partneren e tij.
Sipas mediave italiane, patrulla e Njësisë së Radios Mobile ndërhyri pas një telefonate në 112, ku u raportua një konflikt i ashpër familjar. Grindja, që kishte nisur për çështje të parëndësishme, u përshkallëzua shpejt në dhunë verbale dhe më pas fizike, ku gruaja 33-vjeçare u godit në fytyrë dhe në krahë, në prani të fëmijëve të mitur.
“Thirrja ishte vendimtare. Nga ana tjetër e linjës dëgjohej qartë ankthi i madh i gruas, çka lejoi ndërhyrjen e menjëhershme të forcave të rendit”, raportojnë mediat italiane.
Sapo mbërritën në banesë, karabinierët ndanë menjëherë çiftin dhe rindërtuan ngjarjen. Duke marrë parasysh historikun e sjelljes së dhunshme dhe ndërhyrjet e mëparshme të policisë, 29-vjeçari u arrestua për dhunë në familje.
Pas procedurave standarde, ai u transferua në burgun e Raguzës, ku ndodhet në dispozicion të autoriteteve gjyqësore.
