Një rast i pazakontë është raportuar në Pogradec, ku një efektivi të Burgjeve i është vjedhur arma e shërbimit brenda banesës së tij. Ngjarja është kallëzuar nga vetë punonjësi i policisë së IEVP Drenovë, 48-vjeçari T. Ç., i cili ka njoftuar autoritetet se pistoleta është marrë “gjatë kohës që në shtëpi nuk ndodhej askush”.
Sipas të dhënave paraprake, ngjarja mbetet ende e paqartë dhe autorët nuk janë identifikuar. Nuk përjashtohet asnjë pistë, përfshirë mundësinë e një vjedhjeje të mirëfilltë apo inskenimi, të cilat do të verifikohen nga Prokuroria përmes hetimeve dhe analizës së mikrogjurmëve.
Policia lokale ka konfirmuar se grupi hetimor po punon për zbardhjen e dinamikës dhe kapjen e personave të përfshirë, ndërsa detajet e çështjes mbeten të rezervuara për shkak të natyrës së saj.
Hetimet vijojnë.
