Estevao është kthyer në objektivin kryesor të Manchester Cityt, me klubin anglez që raportohet se është i gatshëm të thyejë çdo rekord financiar për ta siguruar shërbimet e talentit brazilian.
Burime pranë mediave angleze bëjnë me dije se “Citizens” po përgatisin një ofertë që shkon afër 120 milionë euro, të bindur se Estevao është një nga talentet më premtuese në futbollin botëror. Projekti i Pep Guardiolës synon të forcojë edhe më tej repartin ofensiv, ndërsa braziliani shihet si lojtar me potencial për të udhëhequr një epokë të re në “Etihad”.
Menaxhmenti i Cityt ka bërë të qartë se është gati të bëjë gjithçka për të fituar garën për firmën e tij, madje duke marrë në konsideratë edhe dyfishimin e pagës së lojtarit, për ta renditur atë mes më të paguarve në skuadër. Sipas gazetës “Sport”, anësori brazilian përfaqëson një investim strategjik: moshë e re, ndikim i menjëhershëm dhe potencial rritjeje që pak lojtarë e kanë aktualisht.
Estevao konsiderohet mjaft i përshtatshëm për stilin e Guardiolës, i cili preferon lojtarë dinamikë, teknikisht të talentuar dhe me inteligjencë taktike.
Nga ana tjetër, Chelsea nuk ka ndërmend të heqë dorë lehtë. Klubi londinez e sheh brazilianin si një pjesë kyçe të projektit të rindërtimit dhe e konsideron atë një element themelor për të ardhmen e “Stamford Bridge”. Drejtuesit e Chelseat kanë bërë të qartë se do të hyjnë në negociata të forta për ta mbajtur lojtarin, duke besuar se potenciali i tij mund të përcaktojë një epokë të re për klubin.
Gara për Estevaon pritet të jetë një nga sagat më të nxehta të merkatos, me Manchester Cityn dhe Chelsean të gatshme për një përplasje financiare dhe sportive pa precedent.
