Vijojnë pa ndërprerje kërkimet për gjetjen e 30-vjeçarit Jurgen Karaj, banor i Bashkisë Klos, i cili dyshohet se është marrë nga rrjedha e një përroi në fshatin Darsë, pas ngjarjes së ndodhur gjatë orëve të natës.
Në operacionin e kërkimit janë angazhuar forcat e Policisë, forcat speciale “Shqiponja”, si dhe efektivë të Forcave të Armatosura, të cilët po kontrollojnë intensivisht zonën dhe shtratin e përroit. Kërkimet janë shtrirë edhe përgjatë lumit Mat, për shkak të prurjeve të forta dhe dyshimeve se rrjedha e ujit mund ta ketë transportuar më tej trupin e të riut.
Operacioni ka vijuar gjatë gjithë ditës së djeshme dhe është ndërprerë vetëm për shkak të errësirës, ndërsa ka rifilluar që në orët e para të mëngjesit të sotëm, me shpresën për një rezultat pozitiv.
Në terren ndodhen edhe familjarë të 30-vjeçarit, si dhe banorë të zonës, të cilët po ndihmojnë autoritetet në kërkime. Autoritetet bëjnë me dije se operacioni do të vazhdojë pa ndërprerje deri në zbardhjen e plotë të fatit të Jurgen Karajt, ndërsa apelojnë për kujdes të shtuar për shkak të kushteve të vështira dhe prurjeve të larta të ujit.
