Dy çisterna kineze të ngarkuara me naftë kanë dalë mëngjesin e sotëm nga Ngushtica e Hormuzit, sipas të dhënave të transportit detar, duke shtuar shpresat për një normalizim gradual të situatës në një nga korridoret më të rëndësishme energjetike në botë.
Lëvizja e cisternave është interpretuar nga tregjet si një sinjal pozitiv për mundësinë e uljes së tensioneve mes Shtetet e Bashkuara të Amerikës, Izrael dhe Iran.
Ky zhvillim ka ndikuar menjëherë në tregjet ndërkombëtare të energjisë, ku çmimi referencë i naftës bruto Brent pësoi një rënie të lehtë, duke zbritur përkohësisht në 110.16 dollarë për fuçi.
Analisti i Fujitomi Securities, Toshitaka Tazawa, deklaroi se investitorët po përpiqen të kuptojnë nëse Uashingtoni dhe Teherani mund të arrijnë një marrëveshje paqeje që do të shmangte përshkallëzimin e mëtejshëm të konfliktit.
Ai theksoi gjithashtu se qëndrimi i administratës amerikane “ndryshon çdo ditë”, duke reflektuar pasigurinë që vazhdon të dominojë tregjet globale.
Presidenti amerikan Donald Trump ka deklaruar në mënyrë të përsëritur se një marrëveshje me Iranin është afër, ndërsa paralelisht ka paralajmëruar për sulme të ashpra ushtarake nëse Teherani refuzon kompromisin.
Sipas raportimeve, administrata amerikane ndodhet nën presion të madh për të siguruar një marrëveshje që do të garantonte rihapjen dhe sigurinë e plotë të Ngushticës së Hormuzit, rrugë përmes së cilës kalon afërsisht një e pesta e tregtisë globale të naftës dhe gazit të lëngshëm.
Ndërkohë, çmimet e energjisë në SHBA mbeten të larta, duke ushtruar presion politik mbi administratën Trump në prag të zgjedhjeve të Kongresit që pritet të mbahen në nëntor.
