Detaje të reja tronditëse dalin nga dosja voluminoze e SPAK për grupin e strukturuar kriminal “Rraja”, ku zbulohet mekanizmi i brendshëm i komunikimit, kodet sekrete dhe rolet e qarta të anëtarëve në trafikun ndërkombëtar të lëndëve narkotike.
Hetimet e SPAK zbardhin se grupi dyshohet për të paktën tre episode të trafikut të drogës, ndërsa çelësi për zbulimin e aktivitetit kriminal kanë qenë komunikimet e enkriptuara në platformën famëkeqe Sky ECC, të përdorura për të shmangur identifikimin nga autoritetet.
Krimi me kode: nofka, shenja dhe pako alumini
Sipas dosjes hetimore, anëtarët e grupit komunikonin mes tyre me pseudonime dhe përdornin një sistem të sofistikuar kodifikimi për të dalluar pakot e drogës. Lënda narkotike ambalazhohej në qese alumini, ndërsa çdo ngarkesë shënohej me shenja të veçanta për të mos u ngatërruar me pakot e bashkëpunëtorëve të tjerë.
Në qendër të këtij mekanizmi del emri i Aldo Gjinit, i njohur me nofkën “Bjondi”, një figurë kyçe e grupit, i cili kishte rolin e identifikimit dhe shenjimit të pakove. Sipas SPAK, “Bjondi” ishte personi që garantonte rendin dhe ndarjen e saktë të drogës gjatë transportit.
“Bjondi”, figurë e njohur e botës së krimit
Aldo Gjini është një nga personat e arrestuar në operacionin e fundit të SPAK kundër grupit “Rraja”, ku u njoftua për masën e arrestit brenda qelisë. Emri i tij nuk është i panjohur për autoritetet: ai rezulton me precedentë penalë për trafik armësh, trafik droge dhe tentativë vrasjeje, si dhe ka qenë i shpallur në kërkim ndërkombëtar nga INTERPOL.
Në komunikimet e zbardhura, Rexhep Rraja informon bashkëpunëtorët se “Bjondi” do të ishte personi që do bënte shenjat dalluese në pakot e aluminit, për të shmangur çdo konfuzion mes ngarkesave kriminale.
Sky ECC zbërthen grupin “Rraja”
Dosja e SPAK hedh dritë edhe mbi identitetet dhe nofkat e përdorura nga anëtarët e tjerë të grupit. Rexhep Rraja, djali i ish-deputetit socialist Rrahman Rraja, përdorte pseudonimet “XR1” dhe “New Sky”.
Nofka të tjera të evidentuara në dosje janë:
- Islam Sefa – “Kruja”
- Bujar Sefa – “Venecia”
- Hajdar Sefa – “Bruxel”
- Vidjan Baroka – “Rrushi”
- si dhe emërtime të tjera si “Plaku”, “979”, “Detroit USA”, etj.
Operacion masiv dhe pasuri luksoze
Mëngjesin e 10 dhjetorit, SPAK ndërmori një operacion të gjerë në Nikël, duke lëshuar 14 urdhër-arreste, nga të cilat 10 u ekzekutuan. Grupi akuzohet për trafikim të lëndëve narkotike, të kryer në bashkëpunim dhe në formën e grupit të strukturuar kriminal.
Gjatë kontrolleve në banesa, autoritetet sekuestruan shuma të mëdha parash në lekë, euro dhe dollarë, automjete luksoze, armë zjarri, ora Rolex dhe dokumente të ndryshme, që sipas SPAK provojnë nivelin e lartë të aktivitetit kriminal dhe përfitimeve financiare.
