Presidenti i SHBA-së, Donald Trump, ka njoftuar se udhëheqësit e Izraelit dhe Libanit pritet të zhvillojnë një komunikim të drejtpërdrejtë gjatë ditës së sotme, një zhvillim që konsiderohet historik pas më shumë se tre dekadash mungesë dialogu në këtë nivel.
Në një postim në rrjetet sociale, Trump u shpreh se po përpiqet të krijojë hapësirë për uljen e tensioneve mes dy vendeve, duke theksuar se ka kaluar rreth 34 vjet që nga hera e fundit kur liderët e tyre kanë komunikuar drejtpërdrejt.
Deklarata vjen pas bisedimeve të rralla të zhvilluara në Uashington mes përfaqësuesve izraelitë dhe libanezë, në një moment kur rajoni përballet me përshkallëzim të ndjeshëm të konfliktit.
Tensionet janë rritur ndjeshëm që nga përfshirja e Libanit në konfliktin rajonal më 2 mars, kur grupi Hezbollah, i mbështetur nga Irani, nisi sulme ndaj Izraelit. Si pasojë, sipas autoriteteve libaneze, mbi 2 mijë persona kanë humbur jetën nga sulmet izraelite.
Pavarësisht zhvillimeve diplomatike, përplasjet mes forcave izraelite dhe Hezbollahut kanë vijuar edhe ditët e fundit, duke mbajtur situatën të tensionuar dhe të paparashikueshme.
Ende nuk janë bërë publike detaje mbi përfaqësuesit që do të marrin pjesë në këtë komunikim apo formatin e tij, por ky hap shihet si një përpjekje për të hapur një kanal dialogu në një nga konfliktet më të ndërlikuara në Lindjen e Mesme.
