Donald Trump deklaroi këtë të hënë se administrata amerikane do të vazhdojë përpjekjet për një zgjidhje diplomatike me Iranin, pavarësisht refuzimit të fundit nga Teherani ndaj propozimit amerikan.
Në një intervistë për Fox News, Trump u shpreh i bindur se pala iraniane do të detyrohet të lëshojë pe.
“Ata do të tërhiqen”, deklaroi presidenti amerikan kur u pyet për qëndrimin e përfaqësuesve iranianë dhe mundësinë e ndryshimeve të tjera në udhëheqjen e vendit.
Trump shtoi se do të vazhdojë negociatat dhe presionin diplomatik deri në arritjen e një marrëveshjeje.
“Do të merrem me ta derisa të arrijnë një marrëveshje”, tha ai.
Presidenti amerikan foli gjithashtu për mundësinë e rifillimit të projektit të njohur si “Projekti Liria”, duke theksuar se çdo operacion i mundshëm do të ishte më i ashpër se më parë.
Sipas tij, Marina amerikane që shoqëron anijet nëpër Ngushticën e Hormuzit do të ishte vetëm një pjesë e planit më të gjerë.
Në një intervistë tjetër për CBS News, Trump deklaroi se përgjigjja e fundit e Iranit përmbante disa lëshime lidhur me çështjen bërthamore, por theksoi se ato mbeten të pamjaftueshme për Uashingtonin.
Deklaratat e Trump vijnë në një moment tensionesh të larta mes SHBA-së dhe Iranit, pas refuzimit nga Teherani të draftit amerikan për memorandum paqeje dhe vazhdimit të krizës në Ngushticën e Hormuzit.
