Shqiptarët që jetojnë në Mbretërinë e Bashkuar kanë zhvilluar për të dytën ditë radhazi një protestë para Ambasadës së Shqipërisë në Londër, duke shprehur kundërshtimin e tyre ndaj projektit të planifikuar në zonën e Zvërnecit dhe duke kërkuar më shumë transparencë nga autoritetet shqiptare.
Të mbledhur me flamuj kuqezi dhe pankarta, pjesëmarrësit artikuluan shqetësimet e tyre për mbrojtjen e mjedisit, ruajtjen e pasurive natyrore dhe menaxhimin e pronave publike. Gjatë tubimit u dëgjuan edhe thirrje politike kundër qeverisë dhe kryeministrit Edi Rama.
Mesazhi kryesor i protestuesve ishte se pasuritë natyrore dhe zonat e mbrojtura duhet të ruhen në interes të qytetarëve dhe të mos shndërrohen në objekt polemikash apo konfliktesh publike.
Tubimi në Londër është pjesë e një serie aktivitetesh dhe protestash të organizuara nga diaspora shqiptare në vende të ndryshme të Europës dhe Amerikës. Në ditët e fundit, manifestime të ngjashme janë zhvilluar në qytete si Milano, Brukseli, Vjena, New York-u dhe Zyrihu, ku pjesëmarrësit kanë shprehur solidaritet me protestat që po mbahen në Shqipëri.
Organizatorët kanë deklaruar se do të vijojnë mobilizimin e diasporës në mbështetje të kauzave që lidhen me mbrojtjen e mjedisit, transparencën në vendimmarrje dhe interesin publik.
