Komisioni Evropian ka shprehur shqetësime lidhur me zhvillimet e planifikuara në zonën e mbrojtur të Zvërnecit dhe Nartës, duke i kujtuar Shqipërisë detyrimet që rrjedhin nga procesi i anëtarësimit në Bashkimin Evropian dhe harmonizimi me legjislacionin mjedisor evropian.
Sipas deklaratave të cituara nga mediat ndërkombëtare, Brukseli ka theksuar se Shqipëria duhet të shmangë çdo veprim që mund të cenojë përmbushjen e kritereve të nevojshme për mbylljen e kapitujve negociues, veçanërisht atyre që lidhen me mjedisin dhe ndryshimet klimatike.
Në fokus të diskutimeve është projekti turistik i lidhur me investitorë ndërkombëtarë në zonën Vjosë-Nartë, i cili ka nxitur protesta të vazhdueshme nga aktivistë, organizata mjedisore dhe qytetarë brenda dhe jashtë vendit. Kundërshtarët e projektit argumentojnë se zhvillimi mund të ndikojë në ekosistemet e ndjeshme të zonës dhe në habitatet e specieve të mbrojtura.
Komisioni Evropian ka rikujtuar se Shqipëria duhet të harmonizojë plotësisht legjislacionin e saj me direktivat evropiane për mbrojtjen e habitateve natyrore dhe të shpendëve, si pjesë e procesit të negociatave për anëtarësim në BE.
Ndërkohë, autoritetet shqiptare kanë bërë me dije se projekti është subjekt i procedurave ligjore dhe vlerësimeve përkatëse mjedisore. Sipas raportimeve, Ministria e Mjedisit ka informuar institucionet evropiane se procesi i vlerësimit të ndikimit në mjedis do të vijojë në konsultim me grupet e interesit dhe shoqërinë civile.
Debati është zgjeruar edhe te ligji për investimet strategjike, për të cilin Bashkimi Evropian ka kërkuar prej kohësh rishikim dhe përafrim me standardet evropiane, me synimin për të garantuar transparencë më të madhe dhe respektim të plotë të procedurave mjedisore.
Çështja e Zvërnecit po shihet si një provë e rëndësishme për balancimin mes zhvillimit ekonomik, investimeve të huaja dhe mbrojtjes së pasurive natyrore, në një kohë kur Shqipëria synon të përshpejtojë rrugën e saj drejt anëtarësimit në Bashkimin Evropian.
Ndërkohë, protestat kundër projektit vijojnë në disa qytete të vendit dhe kanë gjetur mbështetje edhe nga komunitetet shqiptare jashtë Shqipërisë, duke e kthyer debatin në një nga çështjet më të diskutuara të momentit në vend.
