Mbretëria e Bashkuar ka vendosur të zgjerojë autorizimin për Shtetet e Bashkuara, duke lejuar përdorimin e bazave të saj për operacione ushtarake që synojnë mbrojtjen e trafikut detar në Ngushticën e Hormuzit.
Vendimi u mor gjatë një mbledhjeje të ministrave në Downing Street, ku u ra dakord që SHBA mund të përdorë bazat britanike jo vetëm për operacione mbrojtëse të drejtpërdrejta, por edhe për të goditur objektiva iraniane që kërcënojnë anijet në këtë zonë strategjike.
Më herët, Londra kishte kufizuar përdorimin e bazave vetëm për operacione që mbronin interesat dhe jetët britanike. Tashmë, ky autorizim është zgjeruar në funksion të sigurisë së transportit detar ndërkombëtar.
Megjithatë, autoritetet britanike theksojnë se Britania e Madhe nuk do të përfshihet drejtpërdrejt në sulme, duke ruajtur qëndrimin e saj zyrtar për de-eskalim të konfliktit.
Një zëdhënës i qeverisë deklaroi se bazat do të përdoren për “operacione mbrojtëse amerikane”, me synim ndalimin e sulmeve iraniane ndaj anijeve në një nga rrugët më të rëndësishme të furnizimit global me energji.
Ky zhvillim vjen në një moment tensioni të lartë në Lindjen e Mesme, ku përplasjet po ndikojnë drejtpërdrejt në sigurinë detare dhe në tregjet ndërkombëtare të naftës.
