Prodhuesi amerikan i avionëve Boeing po rrit praninë e tij në Poloni, ndërsa Ministria e Mbrojtjes Kombëtare e vendit po shqyrton blerjen e deri në 32 avionëve të rinj luftarakë. Gjatë një eventi të mbajtur në Varshavë më 29 tetor, kompania prezantoi avionin e saj shumëfunksional F-15EX para zyrtarëve ushtarakë polakë, duke theksuar avantazhet në shpejtësi, rreze fluturimi dhe kapacitet ngarkese, raporton Defense News. Për ta bërë ofertën më tërheqëse, Boeing e shoqëroi atë me një paketë gjithëpërfshirëse bashkëpunimi industrial që përfshin transferim teknologjie dhe ofertën e sistemit pa pilot MQ-28 Ghost Bat, një dron “loyal wingman” që do të operonte krah avionëve luftarakë.
Përfaqësuesit e Boeing kanë zhvilluar takime të shumta me partnerë të mundshëm polakë, ndërsa në “Ditën e Industrisë Boeing” në Varshavë u diskutuan edhe projekte si tankeri KC-46 që po u ofrohet forcave të armatosura polake. Varshava po shqyrton mundësinë e blerjes së 32 avionëve të tjerë F-35 të gjeneratës së pestë, pjesë e një kontrate tashmë ekzistuese, ose alternativën evropiane Eurofighter Typhoon, prodhuar nga Airbus, BAE Systems dhe Leonardo. Boeing ka zgjeruar ndjeshëm aktivitetin e saj në Poloni pas kontratës së vitit të kaluar me vlerë 10 miliardë dollarë për 96 helikopterë sulmues AH-64E Apache, ndërsa në shkurt të këtij viti nënshkroi një marrëveshje shtesë prej 300 milionë dollarësh për marrjen me qira të tetë helikopterëve AH-64D nga SHBA. Edhe pse F-15EX është projektuar kryesisht për Forcat Ajrore Amerikane, Boeing po gjeneron interes të madh ndërkombëtar. Çmimi i një F-15EX për SHBA është rreth 90–97 milionë dollarë, por paketa e eksportit mund të arrijë deri në 300 milionë dollar.
