Sekretari i Përgjithshëm i Partia e Lirisë, Tedi Blushi, ka publikuar një pjesë të fjalës së tij në Kuvend, ku ka kritikuar ashpër qeverinë për situatën ekonomike dhe sociale në vend.
Në reagimin e tij, Blushi renditi një sërë problemesh që, sipas tij, kanë prekur Shqipërinë gjatë viteve të fundit, duke përmendur shpopullimin, korrupsionin, varfërinë dhe largimin masiv të qytetarëve nga vendi.
Ai argumentoi se emigrimi i shqiptarëve nuk mund t’i atribuohet opozitës, por politikave të ndjekura nga qeveria.
“Shpopullimi nuk erdhi nga opozita”, deklaroi Blushi, duke shtuar se Shqipëria po përballet me pasoja të rënda sociale dhe demografike.
Gjatë fjalës së tij, ai ngriti gjithashtu shqetësime për ligje dhe politika që, sipas tij, bien ndesh me traditat dhe vlerat familjare shqiptare.
Blushi theksoi se vendi u përket qytetarëve shqiptarë dhe bëri thirrje për ndryshim politik.
“Kjo tokë ka Zot! Shqipëria u përket shqiptarëve”, u shpreh ai.
Deklaratat e tij vijnë në një periudhë debatesh të forta politike dhe protestash të vazhdueshme në vend, ku opozita dhe partitë e tjera kundërshtare të qeverisë kanë intensifikuar kritikat ndaj ekzekutivit për çështje që lidhen me ekonominë, emigracionin dhe qeverisjen.
