Sipas një analize të publikuar nga BIRN, kryeministri Edi Rama ka ndërmarrë prej disa ditësh sulme publike ndaj gjyqtarëve dhe prokurorëve, duke i akuzuar ata se po kërkojnë padrejtësisht rritje pagash, në lidhje me një çështje që po shqyrtohet në Gjykatën Kushtetuese për mënyrën e llogaritjes së pagave të magjistratëve.
Në reagim ndaj këtyre deklaratave, Shoqata e Prokurorëve kërkoi që procesi kushtetues i nisur nga shoqatat e gjyqtarëve të zhvillohet pa presione politike dhe pa instrumentalizim të opinionit publik.
Polemika u thellua kur Rama pretendoi publikisht se Shoqata e Prokurorëve nuk ishte e regjistruar ligjërisht. Fillimisht ai shkroi se shoqata ishte ende e paregjistruar, ndërsa më pas pretendoi se ajo nuk ishte regjistruar në tatime.
Megjithatë, dokumentet zyrtare tregojnë se Shoqata e Prokurorëve është e regjistruar në gjykatë, e pajisur me NIPT dhe rezulton subjekt tatimpagues që prej fundit të dhjetorit 2025. Këtë fakt e konfirmoi edhe kryetari i shoqatës, Gëzim Spahiu, i cili sqaroi se të gjitha procedurat ligjore janë përmbushur.
BIRN thekson se rasti ngre shqetësime serioze mbi shpërndarjen e informacionit të pasaktë nga përfaqësues të lartë të qeverisë. Gazetari Isa Myzyraj vlerëson se institucionet publike dhe vetë kryeministri janë shpesh burim i dezinformimit, duke nënvizuar se roli i medias mbetet verifikimi i fakteve dhe informimi i saktë i publikut.
Sipas tij, edhe deklaratat e kryeministrit duhet t’i nënshtrohen kontrollit dhe ballafaqimit me dokumentet zyrtare, në funksion të transparencës dhe së vërtetës publike.
