Kreu i Partisë Demokratike, Sali Berisha, zhvilloi një takim në selinë blu me raporterin për Shqipërinë në Bundestagun gjerman, Peter Beyer, ku u diskutuan zhvillimet politike në vend dhe procesi i integrimit europian.
Pas takimit, Berisha deklaroi se gjatë bisedës e ka informuar zyrtarin gjerman për qëndrimet e opozitës dhe për problematikat që, sipas tij, po përballet vendi.
Ai theksoi se opozita mbetet e vendosur për të mbështetur integrimin e Shqipërisë në Bashkimin Europian, duke e cilësuar atë si projektin më të rëndësishëm për të ardhmen e vendit dhe qytetarëve shqiptarë.
Sipas Berishës, në takim u diskutua gjithashtu për sfidat që lidhen me funksionimin e sistemit të drejtësisë dhe situatën politike në vend.
Nga ana e tij, Peter Beyer u shpreh se takimi ishte frytdhënës dhe se një nga temat kryesore të diskutimit ishte procesi i integrimit të Shqipërisë në Bashkimin Europian.
Ai bëri të ditur se gjatë vizitës në Shqipëri ka zhvilluar takime edhe me përfaqësues të qeverisë dhe institucioneve të drejtësisë, përfshirë Prokurorinë e Posaçme (SPAK).
Sipas Beyer, është e rëndësishme që të ketë transparencë dhe një qasje të hapur ndaj sistemit gjyqësor, në mënyrë që të forcohen institucionet dhe të përparojë procesi i integrimit europian të vendit.
