Kryetari i Partisë Demokratike, Sali Berisha, ka hedhur akuza të forta ndaj kompanisë së re “Albanian Digital Solution”, të cilën e cilësoi si një vazhdimësi të modelit të AKSHI-t dhe një instrument të ri për abuzimin me fondet publike.
Në një komunikim me mediat, Berisha deklaroi se struktura e re nuk është krijuar për të përmirësuar shërbimet digjitale, por për të kanalizuar para publike drejt interesave të lidhura me qeverinë.
Sipas tij, “Albanian Digital Solution” përfaqëson atë që ai e quajti “miniera e re e floririt e familjes Rama”, duke pretenduar se institucioni është ngritur pa bazë të qartë ligjore dhe pa mekanizma të mjaftueshëm kontrolli.
“Jam këtu për të denoncuar kopshtin e ri privat, minierën e floririt të familjes Rama apo AKSHI-n me një emër të ri, ‘Albanian Digital Solution’. Është një mënyrë e gjetur për të kanalizuar fondet drejt kompanive të lidhura me qeverinë”, u shpreh Berisha.
Ai pretendoi se nuk ekziston një vendim i plotë i Këshillit të Ministrave që të përcaktojë qartë kompetencat, objektin e veprimtarisë dhe mënyrën e funksionimit të kësaj strukture, ndërsa ngriti pikëpyetje mbi marrëdhënien e saj me AKSHI.
Sipas kreut të opozitës, i vetmi vendim i miratuar deri tani është ai i datës 20 maj 2026, i cili parashikon një fond prej 7 milionë eurosh për kompaninë, pa sqaruar më tej modelin e kontrollit dhe përgjegjësitë institucionale.
Berisha akuzoi gjithashtu qeverinë se po krijon struktura të reja për të zëvendësuar institucionet që, sipas tij, janë përfshirë në skandale dhe hetime, duke argumentuar se modeli i ndjekur me “Albanian Digital Solution” është i ngjashëm me atë që ai pretendon se është përdorur më herët në AKSHI.
Deklaratat e tij vijnë në një moment kur debati publik mbi menaxhimin e projekteve të digjitalizimit dhe përdorimin e fondeve publike në sektorin e teknologjisë vijon të mbetet i fortë në skenën politike shqiptare.
