Kryetari i Partisë Demokratike, Sali Berisha, ka reaguar ashpër pas emërimit të ish-deputetit demokrat Dashnor Sula në postin e Kryeinspektorit të Përgjithshëm nga qeveria. Berisha e cilësoi këtë veprim si një akt të rëndë tradhtie politike dhe morale.
Në deklaratën e tij, Berisha e quajti Sulën “mollë të kalbur”, duke thënë se ai ka zgjedhur të rreshtohet me qeverinë në një nga momentet më të errëta të saj. Sipas kreut të PD-së, pranimi i këtij posti përbën braktisje të idealeve demokratike dhe tradhti ndaj mbështetësve të tij.
Berisha theksoi se Dashnor Sula ka tradhtuar besimin e burrave dhe grave që për 12 vite e kanë mbështetur politikisht, pavarësisht gabimeve të mundshme. Ai nënvizoi se ky veprim nuk është thjesht një zgjedhje personale, por një akt që dëmton rëndë moralin dhe besimin politik.
“Nëse tradhtia ndaj atdheut quhet tradhti e lartë, atëherë edhe tradhtia ndaj idealeve të demokracisë është po aq e rëndë”, u shpreh Berisha, duke shtuar se rreshtimi me qeverinë në këtë moment përfaqëson aktin më ekstrem të tradhtisë politike.
Sipas tij, ky zhvillim tregon se emërimi i Sulës ishte i paracaktuar dhe se ai kishte kohë që ishte shkëputur nga parimet për të cilat ishte zgjedhur.
