Kryetari i Partisë Demokratike, Sali Berisha, ka lëshuar akuza të forta ndaj kryeministrit Edi Rama dhe qeverisë së tij, duke i lidhur me veprimtarinë e grupeve kriminale të goditura së fundmi nga Prokuroria e Posaçme kundër Korrupsionit dhe Krimit të Organizuar (SPAK).
Gjatë një deklarate për mediat, Berisha iu referua operacionit të fundit të SPAK kundër një organizate kriminale të dyshuar për trafik ndërkombëtar droge dhe pastrim parash, ndërsa falënderoi strukturat e drejtësisë për hetimet dhe rezultatet e arritura.
Sipas liderit demokrat, zbulimet e fundit tregojnë përmasa shqetësuese të ndikimit të krimit të organizuar në Shqipëri dhe lidhjet që, sipas tij, kanë ekzistuar mes elementëve kriminalë dhe qeverisë.
“Shqiptarët e kuptuan se regjimi i Ramës noton në drogë dhe krim. Organizatat kriminale kanë pasur fuqi të jashtëzakonshme dhe kanë vepruar të mbështetura politikisht”, deklaroi Berisha.
Ai përmendi në mënyrë të veçantë grupin e dyshuar të drejtuar nga Salvadore Aliu, për të cilin SPAK pretendon se ka qenë i përfshirë në trafikimin e sasive të mëdha të kokainës në Europë dhe Amerikën Latine.
Berisha ngriti gjithashtu akuza ndaj koordinatorit të Kryeministrisë, Ergys Agasi, duke pretenduar se ai ka pasur rol në kontaktet me individë të lidhur me botën e krimit. Këto akuza nuk janë shoqëruar me prova publike dhe nuk ka pasur reagim zyrtar nga Agasi apo qeveria lidhur me deklaratat e kreut të opozitës.
“Ky është një rrezik madhor jo vetëm për Shqipërinë, por edhe për partnerët ndërkombëtarë. Bandat kriminale kanë vepruar në disa vende të botës dhe kanë pasur mbështetje politike”, u shpreh Berisha.
Deklaratat e tij vijnë pas operacionit të fundit të SPAK, i cili çoi në lëshimin e masave të sigurisë për 10 persona të dyshuar për trafik ndërkombëtar droge dhe pastrim parash, si dhe në sekuestrimin e qindra pasurive me një vlerë të konsiderueshme ekonomike.
Ndërkohë, hetimet për këtë çështje vijojnë dhe autoritetet shqiptare po bashkëpunojnë me agjenci ligjzbatuese ndërkombëtare për arrestimin e personave që ndodhen jashtë territorit të Shqipërisë.
