Instituti i Gjeoshkencave ka publikuar parashikimin e motit për pasditen e sotme, e enjte 1 janar, si edhe për ditën e nesërme, të premte 2 janar, duke paralajmëruar kushte të paqëndrueshme atmosferike dhe rënie të ndjeshme të temperaturave.
Sipas IGJEUM, temperaturat e ulëta do të favorizojnë formimin e ngricave, veçanërisht në zonat malore dhe kodrinore, çka mund të sjellë vështirësi në qarkullimin rrugor. Drejtuesit e mjeteve këshillohen për kujdes të shtuar, sidomos në akset e veriut dhe lindjes së vendit.
Reshjet
Gjatë pasdites së sotme nuk priten reshje të konsiderueshme. Ndërsa nesër, moti do të përkeqësohet kryesisht në veri të vendit. Në qarqet Shkodër dhe Kukës parashikohen reshje mesatare deri lokalisht intensive, të shoqëruara me shtrëngata.
Në qarqet Dibër, Lezhë, Elbasan, Vlorë dhe Gjirokastër priten reshje të dobëta deri mesatare, ndërsa në pjesën tjetër të territorit reshjet do të jenë të pakta.
Në zonat alpine parashikohet dëborë e dendur, ndërsa në veri, lindje dhe juglindje, mbi 600 metra mbi nivelin e detit, do të ketë reshje të dobëta dëbore.
Temperaturat
Për ditën e nesërme, temperaturat minimale dhe maksimale pritet të jenë:
- Bregdeti: 2°C / 13°C
- Zonat e ulëta: 0°C / 13°C
- Zonat malore: -5°C / 5°C
Era
Era sot pasdite do të fryjë e lehtë deri mesatare, ndërsa nesër, veçanërisht në zonat bregdetare, pritet të jetë mesatare deri e fortë.
Autoritetet u bëjnë thirrje qytetarëve të ndjekin përditësimet zyrtare të motit dhe të tregojnë kujdes, sidomos gjatë udhëtimeve në zonat malore dhe ato me rrezik për ngrica.
