Autoriteti Rrugor Shqiptar ka nisur punën në disa fronte për zhbllokimin e aksit Elbasan–Librazhd–Qafë Thanë, pas rrëshqitjes së dheut që bllokoi qarkullimin në segmentin Librazhd–Prrenjas.
Aktualisht, po kryhet heqja e masave të dheut në të dy anët e rrugës ekzistuese, me qëllim hapjen e terrenit për vendosjen e sondave dhe realizimin e një studimi të detajuar gjeologjik. Paralelisht do të bëhet edhe vlerësimi teknik i plotë i zonës për të përcaktuar ndërhyrjet e nevojshme.
Ndërkohë, me mobilizim të shtuar të mjeteve të rënda, po sistemohet rrjedha e Lumi Shkumbin, duke e orientuar në krahun e majtë. Kjo ndërhyrje synon krijimin e hapësirës për ndërtimin e një rruge alternative përgjatë linjës hekurudhore, që do të mundësojë rikthimin e qarkullimit.
Sipas ARRSH-së, pas përfundimit të studimit gjeologjik do të nisë ripunimi i projektit të zbatimit për aksin e ri rrugor, me synim rikthimin sa më të shpejtë dhe të sigurt të lëvizjes drejt juglindjes së vendit.
