Në kuadër të operacionit policor të koduar “Kombinimi”, Policia e Tiranës ka vënë në pranga Markeliano Pirtea, 35 vjeç, banues në kryeqytet. Gjatë kontrollit në banesë, autoritetet gjetën një pistoletë të fshehur te depozita e ujit, municion luftarak dhe 135 gramë kokainë, të ndarë në doza, të gatshme për shitje.
Sipas Policisë, Pirtea përdorte këto lëndë narkotike për shpërndarje në zona të ndryshme të Tiranës. Gjithashtu, gjatë një konflikti për motive të dobëta, ai dyshohet se ka goditur me qytën e armës një tjetër person, S. I., duke i shkaktuar dëmtime sipërfaqësore.
Materialet procedurale janë dorëzuar tashmë tek Prokuroria pranë Gjykatës së Shkallës së Parë të Juridiksionit të Përgjithshëm, Tiranë, që të kryejë hetimet e plota dhe të vendosë masat ligjore kundër të arrestuarit. Autoritetet theksojnë vazhdimin e aksioneve për goditjen e armëmbajtjes pa leje dhe shpërndarjes së drogës në kryeqytet.
