Analisti austriak i mbrojtjes, Wolfgang Pusztai, vlerëson se Irani gëzon aktualisht një avantazh ushtarak afatshkurtër në përballjen me Shtetet e Bashkuara, kryesisht për shkak të pozicionit të tij në Ngushticën e Hormuzit.
Në një intervistë për Al Jazeera, Pusztai tha se kontrolli i Iranit mbi këtë korridor strategjik i jep Teheranit një pozicion të favorshëm në aspektin ushtarak.
“Për momentin, Irani ndodhet në një pozicion teknikisht më të favorshëm, veçanërisht nga pikëpamja ushtarake,” u shpreh ai.
Megjithatë, analisti theksoi se në planin afatgjatë Shtetet e Bashkuara mbeten në një pozitë më të fortë strategjike për shkak të kapaciteteve të tyre ushtarake, ekonomike dhe diplomatike.
Sipas Pusztait, ulja e tensioneve dhe rikthimi i palëve në negociata do të kërkojë angazhimin e aktorëve të rëndësishëm ndërkombëtarë. Ai veçoi Kinën dhe Indinë, të cilat, si partnerët më të mëdhenj ekonomikë dhe importuesit kryesorë të energjisë nga Irani, mund të ushtrojnë ndikim të konsiderueshëm mbi Teheranin.
“Kina dhe India kanë një levë të rëndësishme ekonomike që mund të ndihmojë në shtyrjen e Iranit drejt depërshkallëzimit dhe rikthimit në tryezën e bisedimeve,” deklaroi ai.
Komentet e analistit vijnë në një kohë tensionesh të larta në Gjirin Persik, ku zhvillimet në Ngushticën e Hormuzit vazhdojnë të ngjallin shqetësime për sigurinë e lundrimit dhe tregtisë globale të energjisë.
