Ushtruesja e detyrës së presidentit të Kosovës, Albulena Haxhiu, pritet të përballet me një sërë vendimesh të rëndësishme kushtetuese, të cilat do të testojnë rolin dhe paanshmërinë e saj në krye të shtetit.
Sipas njohësve të Kushtetutës, kompetencat e saj janë të plota dhe nuk ndryshojnë nga ato të një presidenti të zgjedhur. Një nga sfidat e para është emërimi i anëtarit të dhjetë të Komisioni Qendror i Zgjedhjeve, një çështje që ka shkaktuar përplasje politike mes partive kryesore.
Ish-anëtari i Gjykatës Kushtetuese, Kadri Kryeziu, thekson se presidenti në detyrë duhet të ushtrojë funksionin me neutralitet të plotë, duke qenë garantues i unitetit dhe funksionimit institucional. Sipas tij, Haxhiu ka të gjitha kompetencat kushtetuese dhe duhet të vendosë vetëm në bazë të interesit të shtetit dhe ligjit.
Nga ana tjetër, juristë si Arbër Jashari theksojnë se ajo mund të ushtrojë të gjitha funksionet, përfshirë dekretimin dhe shpalljen e ligjeve në Gazetën Zyrtare, si dhe vendime për emërime në institucione të pavarura.
Megjithatë, pikërisht këto vendime – sidomos ato që kërkojnë konsensus politik – pritet të jenë më sfidueset. Çdo veprim i saj mund të kontestohet dhe të përfundojë në Gjykatën Kushtetuese, duke e kthyer këtë periudhë në një test të rëndësishëm për funksionimin institucional në Kosovë.
Në këtë kontekst, roli i saj nuk është vetëm formal, por thelbësor për ruajtjen e balancave politike dhe kushtetuese në vend.
