Kreu i Partia Demokratike e Shqipërisë, Sali Berisha, do të zhvillojë ditën e martë, më 14 prill, një mbledhje me Kolegjin e Kryetarëve, në prag të protestës së paralajmëruar nga opozita.
Takimi pritet të mbahet në orën 14:00 dhe do të përfshijë jo vetëm drejtuesit kryesorë të partisë, por edhe drejtuesit politikë dhe të deleguarit në qarqe. Mbledhja vjen në një moment kyç për opozitën, ndërsa përgatitjet për protestën e së premtes hyjnë në fazën përfundimtare.
Sipas informacioneve, në rend të ditës do të jetë organizimi i protestës, ku do të diskutohen detajet logjistike, mobilizimi i strukturave në terren dhe koordinimi i pjesëmarrjes nga qarqet. Pritet që drejtuesit të japin raportime mbi gatishmërinë e bazës dhe nivelin e angazhimit në secilin rajon.
Një tjetër pikë e rëndësishme e mbledhjes do të jetë procesi i anëtarësimeve të reja në parti. Burime brenda PD bëjnë me dije se drejtuesit do të shqyrtojnë ecurinë e këtij procesi dhe mënyrat për të zgjeruar më tej strukturat, në një periudhë që konsiderohet vendimtare për aktivitetin politik të opozitës.
Mbledhja e Kolegjit të Kryetarëve shihet si një hap organizativ për të konsoliduar aksionin opozitar dhe për të rritur presionin politik përmes protestës së paralajmëruar, e cila pritet të jetë një nga aktivitetet kryesore të opozitës në ditët në vijim.
