Policia e Elbasanit ka arrestuar drejtuesin e kamionit të përfshirë në aksidentin tragjik të ndodhur një ditë më parë në aksin rrugor Gramsh–Poroçan, ku humbi jetën një grua.
38-vjeçari, banues në Gramsh, u vu në pranga pas përfundimit të veprimeve procedurale dhe akuzohet për drejtim automjeti në mënyrë të parregullt, me pasojë vdekjen. Nga aksidenti humbi jetën shtetasja D. H., ndërsa drejtuesi i mjetit dhe një pasagjere mbetën të plagosur.
Sipas policisë, të dëmtuarit ndodhen aktualisht në spital nën kujdesin e mjekëve dhe janë jashtë rrezikut për jetën. Hetimet paraprake tregojnë se aksidenti ka qenë i rëndë, ndërsa autoritetet po punojnë për të sqaruar plotësisht rrethanat dhe shkaqet që çuan në ngjarjen fatale.
Materialet procedurale i janë referuar prokurorisë për veprime të mëtejshme ligjore, ndërsa drejtuesi i kamionit do të përballet me drejtësinë për pasojat e aksidentit që i mori jetën një qytetareje.
