Analisti Agim Baçi ka kritikuar ashpër qëndrimin e Partia Demokratike dhe të kreut të saj Sali Berisha, pas votimit të përbashkët me mazhorancën të rezolutës për integrimin europian në Kuvend.
Në një intervistë televizive, Baçi deklaroi se problemi nuk qëndron tek kompromisi politik në vetvete, por tek kontradikta mes retorikës së opozitës dhe veprimit final në Parlament.
“Me Ramën nuk integrohemi, Rama ka bllokuar integrimin, Rama është narkotrafikant – këto janë deklarata që opozita i ka bërë vazhdimisht. Dhe më pas shkon e firmos një rezolutë pa debat real”, u shpreh ai.
Sipas Baçit, seanca parlamentare tregoi mungesë serioziteti nga opozita, pasi deputetët munguan gjatë diskutimeve dhe u paraqitën vetëm në momentin e votimit.
Ai tha se opozita humbi mundësinë për të kërkuar llogari konkrete ndaj qeverisë së Edi Rama për çështje që lidhen me procesin e integrimit, korrupsionin dhe fondet europiane.
Analisti sugjeroi se afrimi mes palëve mund të ketë ardhur edhe pas presionit ndërkombëtar, sidomos pas përplasjes së fundit të Berishës me ambasadorin e BE-së në Tiranë, Silvio Gonzato.
“Ndoshta e pa që nuk kishte më asnjë shteg”, tha Baçi, duke lënë të kuptohet se opozita u detyrua të zbusë retorikën e saj.
Ai shtoi se mungesa e qëndrimeve të qarta dhe kontradiktat politike po ndikojnë drejtpërdrejt në humbjen e mbështetjes qytetare për opozitën.
“Ka një refuzim të protestave dhe opozita nuk po arrin të kuptojë pse qytetarët po e braktisin”, deklaroi Baçi.
Sipas tij, pa një strategji të qartë dhe pa koherencë mes fjalëve dhe veprimeve, opozita rrezikon të thellojë krizën e besimit publik.
