Partia gjermane e ekstremit të djathtë, Alternativa për Gjermaninë (AfD), ka shënuar një zhvillim të rëndësishëm politik duke siguruar pjesëmarrjen në Konferencën e Sigurisë në Mynih, një nga forumet më prestigjioze të sigurisë në botë. Ky hap konsiderohet një fitore simbolike për AfD-në, e cila prej vitesh ka qenë e përjashtuar nga ngjarje të këtij niveli për shkak të qëndrimeve të saj radikale.
Për tre vite radhazi, partia ishte refuzuar nga organizatorët e konferencës. Vitin e kaluar, AfD ndërmori edhe hapa ligjorë për të kundërshtuar përjashtimin, ndërsa këtë vit duket se ka arritur qëllimin përmes presioneve politike dhe kontakteve ndërkombëtare, veçanërisht me qarqe pranë administratës amerikane.
Në konferencën e këtij viti janë ftuar tre deputetë të AfD-së në Bundestag, edhe pse udhëheqja e partisë kishte kërkuar pjesëmarrjen e saj zyrtare, përfshirë kryetaren Alice Weidel. Një prej deputetëve të ftuar, Heinrich Koch, deklaroi se ftesat erdhën si rezultat i ndikimit që AfD ka arritur të krijojë në kontaktet e saj ndërkombëtare, veçanërisht në SHBA.
Organizatorët e konferencës kanë mohuar se ftesa erdhi si pasojë e presioneve politike. Kryetari i konferencës, diplomati i njohur gjerman Wolfgang Ischinger, theksoi se ky vendim pasqyron realitetin politik në Gjermani, ku AfD është aktualisht forca më e madhe opozitare. Sipas tij, përjashtimi i një partie me një peshë të tillë politike do të ishte i vështirë për t’u justifikuar në një forum që synon të përfaqësojë një gamë të gjerë pikëpamjesh.
Pjesëmarrja e AfD-së në Konferencën e Sigurisë në Mynih shihet nga analistët si një hap drejt normalizimit ndërkombëtar të partisë dhe një sinjal se e djathta ekstreme në Evropë po fiton gjithnjë e më shumë hapësirë në skenën politike dhe diplomatike globale.
