Përplasjet mes Adriatik Lapajt, mbështetësve të tij dhe forcave të Policisë janë përsëritur sërish këtë pasdite në sheshin para Kryeministrisë.
Shkak i tensioneve është bërë vendosja e një gardhi metalik nga policia, në hyrje të trotuarit, veprim që ka sjellë largimin e Lapajt dhe protestuesve të tij nga hapësira ku ata qëndrojnë prej disa ditësh në formë proteste të vazhdueshme.
Në pamjet e shpërndara nga vendngjarja, dëgjohen thirrje të drejtpërdrejta ndaj efektivëve të policisë, si:
“Çfarë po bëni? A jeni normal?”, ndërsa protestuesit akuzojnë uniformat blu se po u mohohet e drejta për të protestuar.
Vetë kreu i “Shqipëria Bëhet”, Adriatik Lapaj, dëgjohet në video duke deklaruar se policia po tenton largimin e tyre nga sheshi, me arsyetimin se do të zhvillohet një tjetër protestë, duke ngritur pyetjen:
“Po ne këtu çfarë po bëjmë? Nuk është kjo protestë?”
Sipas Lapajt, policia ka ushtruar edhe dhunë ndaj një protestuesi, çka ka bërë që në vendngjarje të kërkohet ndërhyrja e ambulancës për ndihmë mjekësore.
Gardhi metalik është vendosur në prag të protestës së njoftuar nga Partia Demokratike dhe Sali Berisha, e njohur si “Foltorja”, e cila pritet të nisë në orën 18:00 para Kryeministrisë.
Lapaj dhe mbështetësit e tij kanë kundërshtuar ashpër këtë veprim, duke u shtyrë fizikisht me policinë dhe duke e konsideruar largimin e tyre si një akt diskriminues dhe selektiv ndaj protestave.
Situata në shesh mbetet e tensionuar, ndërsa pritet të shihet nëse policia do të lejojë bashkëjetesën e dy protestave apo do të vijojë me zhvendosjen e protestuesve të “Shqipëria Bëhet”.
