Protestuesit nisën marshimin nga sheshi “Skënderbej” drejt godinës së Kryeministrisë, në kuadër të protestës së radhës të organizuar në Tiranë.
Sipas organizatorëve, protesta përbën ditën e 54-t të mobilizimit të tyre dhe ka si kërkesë kryesore dorëheqjen e kryeministrit Edi Rama dhe largimin e qeverisë.
Organizatorët kanë bërë thirrje për pjesëmarrje në protestë, duke deklaruar se tubimet do të vijojnë edhe në ditët në vijim deri në realizimin e kërkesave të tyre.
Sipas protestuesve, kundërshtimet lidhen me një sërë çështjesh, përfshirë investimin në Zvërnec, ligjin për investitorët strategjikë, Paketën e Maleve, si dhe ndryshimet që prekin zonat e mbrojtura dhe trashëgiminë kulturore. Gjatë protestave janë artikuluar gjithashtu kërkesa për ndryshime politike dhe institucionale.
Më herët gjatë ditës, para godinës së Kuvendit u zhvillua një tjetër protestë, gjatë së cilës u regjistruan tensione mes një pjese të protestuesve dhe forcave të Policisë së Shtetit. Sipas raportimeve nga vendngjarja, disa protestues hodhën vezë në drejtim të deputetëve, ndërsa policia ndërhyri për të menaxhuar situatën.
Deri në publikimin e këtij materiali, autoritetet nuk kanë dhënë një bilanc përfundimtar mbi incidentet e regjistruara gjatë protestës. Pretendimet e organizatorëve lidhur me përdorimin e forcës nga policia nuk janë konfirmuar zyrtarisht dhe Policia e Shtetit ka nisur verifikimet për ngjarjet e raportuara.
