Këngëtari Alban Skënderaj ka reaguar publikisht për herë të parë pas debatit të krijuar në rrjetet sociale dhe në protestat e zhvilluara në Tiranë, ku emri i tij u përmend mes figurave publike që u kritikuan për mungesë qëndrimi.
Përmes një postimi në rrjetet sociale, artisti njoftoi se koncerti i tij “MOTIV”, i planifikuar të zhvillohej gjatë muajit gusht në Vlorë, nuk do të mbahet sipas planit dhe është shtyrë për një datë të pacaktuar.
Në reagimin e tij, Skënderaj shprehet se vendimi është marrë për shkak të situatës aktuale në vend, duke theksuar se koncerti ishte përgatitur prej muajsh me një angazhim të madh nga i gjithë ekipi organizues.
“Megjithatë, për shkak të situatës së krijuar në vend kam vendosur që koncerti i planifikuar në Vlorë të mos zhvillohet ose të shtyhet për një datë të pacaktuar”, shkruan artisti.
Më tej, ai thekson se muzika, sipas tij, duhet të shërbejë si një faktor bashkimi dhe shprehu shpresën që situata të zgjidhet në mënyrë paqësore dhe me dialog.
Vendimi i Skënderajt vjen në një periudhë kur protesta të përditshme po zhvillohen në kryeqytet, ndërsa në rrjetet sociale është diskutuar edhe roli dhe qëndrimi i figurave publike përballë zhvillimeve të fundit. Reagimi i artistit ka ngjallur komente të ndryshme në publik, me mbështetës dhe kritikë që kanë interpretuar në mënyra të ndryshme vendimin për shtyrjen e koncertit.
