Kryetari i Partisë Mundësia, Agron Shehaj, ka reaguar pas deklaratës së kryeministrit Edi Rama në Gjermani, ku ky i fundit u shpreh se do të dëshironte që Shqipëria t’i ofronte Gjermanisë një sistem të bazuar në inteligjencën artificiale për luftën kundër korrupsionit.
Në një deklaratë publike, Shehaj e cilësoi këtë qëndrim si kontradiktor, duke theksuar se, sipas tij, ndërsa në Shqipëri vijojnë protestat kundër qeverisë, kryeministri po flet jashtë vendit për luftën ndaj korrupsionit.
Sipas kreut të Partisë Mundësia, deklaratat e Ramës lidhen me përpjekjen e tij për të shmangur përgjegjësinë politike dhe ligjore. Ai u shpreh se protestat e zhvilluara prej javësh kanë si kërkesë dorëheqjen e kryeministrit dhe përballjen e tij me drejtësinë.
“Edi Rama flet për luftën kundër korrupsionit në Gjermani, ndërsa shqiptarët kërkojnë një qeveri të pakorruptuar dhe që ai të dalë para drejtësisë. Askush nuk duhet të jetë mbi ligjin dhe kushdo që abuzon me detyrën duhet të mbajë përgjegjësi,” deklaroi Shehaj.
Deklarata vjen në vijim të reagimeve të opozitës dhe forcave të tjera politike ndaj vizitës së kryeministrit Rama në Gjermani dhe komenteve të tij mbi përdorimin e inteligjencës artificiale në luftën kundër korrupsionit.
