Një media franceze i ka kushtuar një artikull protestave që po zhvillohen prej rreth një muaji në Shqipëri, të cilat nisën pas kundërshtimeve ndaj një projekti turistik të lidhur me investitorët Jared Kushner dhe Ivanka Trump në zonën e mbrojtur të Zvërnecit.
Sipas artikullit, mijëra qytetarë kanë protestuar në Tiranë duke shprehur kundërshtimin ndaj projektit dhe duke ngritur akuza për mungesë transparence, korrupsion dhe mënyrën e qeverisjes në vend.
Media përshkruan zonën e Vjosa–Nartës si një ekosistem me rëndësi të veçantë për biodiversitetin, ku gjenden specie të mbrojtura si flamingot rozë dhe pelikani kaçurrel. Në artikull thuhet se protestuesit kundërshtojnë zbatimin e ndryshimeve ligjore të vitit 2024, të cilat, sipas tyre, mundësojnë zhvillime turistike në zona të mbrojtura.
Artikulli ndalet edhe te reagimet e kryeministrit Edi Rama ndaj protestave, si dhe te hetimet e nisura ndaj një numri protestuesish për vepra të ndryshme penale që lidhen me zhvillimin e tubimeve.
Sipas medias franceze, kërkesat e protestuesve janë zgjeruar përtej kundërshtimit të projektit turistik, duke përfshirë edhe çështje si korrupsioni, kostoja e jetesës, sistemi shëndetësor, pensionet dhe emigracioni.
Në artikull përmendet gjithashtu se kompania e Jared Kushner kishte planifikuar më herët një projekt zhvillimi edhe në Serbi, i cili nuk u realizua pas kundërshtimeve publike dhe procedurave ligjore.
Qeveria shqiptare ka mbrojtur më herët projektin, duke deklaruar se investimi do të respektojë procedurat ligjore dhe standardet mjedisore, ndërsa kundërshtarët e tij vazhdojnë të kërkojnë ndalimin e zhvillimit dhe më shumë transparencë mbi procesin.
