Kreu i Grupit Parlamentar të Partisë Demokratike, Gazment Bardhi, i ka bërë thirrje Prokurorisë së Posaçme (SPAK) që t’i drejtohet Kuvendit me kërkesë për heqjen e imunitetit dhe arrestimin e deputetes së Partisë Socialiste, Belinda Balluku.
Në një deklaratë për mediat nga Kryesia e Kuvendit, Bardhi ngriti pikëpyetje mbi vonesën e SPAK-ut për të ndërmarrë këtë hap, duke pretenduar se prokuroria po zbaton standarde të dyfishta në trajtimin e çështjes.
Sipas tij, pas njoftimit të SPAK-ut të 4 qershorit 2026, ku u bë e ditur se hetimet ndaj Ballukut janë zgjeruar me dyshime për korrupsion pasiv dhe pastrim parash, pozita e saj procedurale është rënduar dhe kjo, sipas Bardhit, duhet të shoqërohet edhe me kërkesë për një masë më të ashpër sigurie.
Deputeti demokrat iu referua gjithashtu pretendimeve të SPAK-ut për sekuestrimin e një vile në një resort në Dhërmi, për të cilën prokuroria dyshon se është përfituar në mënyrë të paligjshme dhe është fshehur përmes kontratave fiktive.
Bardhi ngriti disa pyetje publike ndaj Prokurorisë së Posaçme, duke kërkuar sqarime se përse ende nuk i është drejtuar Kuvendit me kërkesën për heqjen e imunitetit të deputetes socialiste dhe nëse ka pasur ndërhyrje politike që kanë ndikuar në ritmin e procedurave.
Sipas tij, zbatimi i një standardi të njëjtë për të gjitha rastet është thelbësor për besueshmërinë e sistemit të drejtësisë.
Belinda Balluku dhe SPAK nuk kanë reaguar publikisht ndaj deklaratave të Gazment Bardhit deri në momentin e publikimit të këtij materiali.
