Gazetarja investiguese Klodiana Lala ka ngritur shqetësime serioze mbi mënyrën se si grupet e krimit të organizuar dyshohet se pastrojnë para në Shqipëri, duke përdorur banka, zyra këmbimi valutor (exchange), noterë dhe struktura të tjera financiare.
E ftuar në një emision televiziv, Lala deklaroi se autoritetet amerikane kanë shtuar vëmendjen ndaj aktivitetit të grupeve kriminale shqiptare, duke bërë të ditur se një agjent i Administratës Amerikane Kundër Drogës (DEA) ndodhet prej muajsh në Shqipëri për të ndjekur hetimet që lidhen me organizatat kriminale të vendosura në Amerikën Latine.
Sipas saj, ekziston një rrezik i lartë që të ardhurat e përfituara nga aktivitetet kriminale jashtë vendit të rikthehen dhe të investohen në Shqipëri.
Lala theksoi se në shumë raste autoritetet kanë vështirësi të identifikojnë vendndodhjen e pasurive të personave të akuzuar për trafik ndërkombëtar droge. Ajo solli si shembull disa emra të përmendur në dosje hetimore, duke ngritur pikëpyetje mbi destinacionin e miliona eurove që dyshohet se janë përfituar nga aktivitetet kriminale.
Sipas gazetares, pastrimi i parave nuk mund të realizohet pa një rrjet bashkëpunimi që përfshin profesionistë dhe institucione të ndryshme financiare. Ajo vuri në dukje kontrastin mes kontrolleve të rrepta që u bëhen qytetarëve të zakonshëm për shuma relativisht të vogla dhe lëvizjes së milionave eurove pa u sinjalizuar nga mekanizmat e kontrollit financiar.
Lala përmendi gjithashtu rastin e grupit “Pepa”, ku sipas saj janë zhdukur miliona euro nga një llogari noteriale, ndërsa u zbulua edhe një plan për rrëmbimin e një drejtuesi banke. Sipas saj, raste të ngjashme mund të kenë ndodhur edhe më herët pa u bërë publike.
Në përfundim, gazetarja ngriti shqetësime edhe për kontrollin e investimeve të mëdha në vend, duke kërkuar verifikime më të forta mbi burimin e kapitalit të kompanive që deklarojnë projekte me vlera shumë të larta financiare. Ajo theksoi se lufta kundër pastrimit të parave kërkon hetime më të thelluara dhe bashkëpunim më të gjerë mes institucioneve shqiptare dhe partnerëve ndërkombëtarë.
