Avokati Romeo Kara iu bashkua mbrëmjen e sotme protestës qytetare që po zhvillohet për të 18-ën ditë radhazi në Tiranë, duke mbajtur një fjalim para protestuesve të mbledhur pranë Kryeministrisë.
Në fjalën e tij, Kara theksoi se lëvizja qytetare përfaqëson njerëzit që, sipas tij, janë ndier të papërfaqësuar dhe të lënë pas dore nga institucionet ndër vite.
“Ka ardhur koha që ky popull të kërkojë dhe të fitojë dinjitetin e humbur. Kjo është tribuna e njerëzve të papërfaqësuar deri tani, e qytetarëve që ndihen të braktisur nga shteti dhe të zhgënjyer nga politika”, deklaroi ai.
Avokati u ndal edhe te rëndësia e organizimit qytetar, duke argumentuar se ndryshimet e mëdha shoqërore lindin nga vullneti i njerëzve dhe jo nga strukturat tradicionale politike.
“Nuk ka organizim më të fortë sesa ai që buron nga shpirti i një populli që kërkon liri dhe dinjitet. Nuk ka rrugë tjetër veçse të ngrihemi dhe të përballemi me problemet që na shqetësojnë”, tha Kara.
Ai bëri thirrje për bashkim të qytetarëve pavarësisht bindjeve politike, duke theksuar se çështjet që prekin të ardhmen e vendit duhet të tejkalojnë ndarjet partiake.
“Të jemi bashkë pavarësisht ndasive politike. Mos u tërhiqni nga të drejtat tuaja. Ju po shkruani të ardhmen dhe rezultatet e kësaj përpjekjeje do të ndihen në kohën që vjen”, u shpreh ai para protestuesve.
Fjalimi i Karës u prit me duartrokitje nga pjesëmarrësit, ndërsa protesta vijoi me marshim dhe aktivitete simbolike në qendër të kryeqytetit.
Lëvizja qytetare, e nisur fillimisht si reagim ndaj zhvillimeve në zonat e mbrojtura të Zvërnecit dhe Sazanit, është zgjeruar në javët e fundit duke përfshirë kërkesa më të gjera që lidhen me qeverisjen, korrupsionin, emigracionin dhe të ardhmen ekonomike të vendit.
