Gjatë grumbullimit të protestuesve në Sheshi Skënderbej, një prej organizatorëve të protestës u bëri thirrje pjesëmarrësve të shmangin provokimet dhe të ruajnë karakterin paqësor të tubimit.
Mes thirrjeve të protestuesve për dorëheqjen e qeverisë, ai deklaroi se objektivi kryesor i lëvizjes mbetet largimi i qeverisë aktuale, ndërsa theksoi se protesta nuk identifikohet as me mazhorancën dhe as me opozitën tradicionale.
Në fjalën e tij ai falënderoi gjithashtu diasporën shqiptare për mbështetjen e protestave, duke theksuar se shqiptarët jashtë vendit po ndjekin dhe mbështesin zhvillimet në Shqipëri.
Një nga mesazhet kryesore ishte thirrja për të mos u përçarë dhe për të mos ndjekur iniciativa që mund të devijojnë protestën nga qëllimet e saj.
“Mos bini pre e asnjë grupimi”, u shpreh ai, duke u kërkuar pjesëmarrësve të ruajnë qetësinë gjatë marshimit.
Sipas organizatorëve, marshimi i mbrëmjes pritet të zhvillohet brenda perimetrit të zonës qendrore të Tiranës, ndërsa protestuesit vazhdojnë të artikulojnë kërkesat e tyre për ndryshime politike dhe institucionale.
Protestat kundër qeverisë kanë hyrë në ditën e 16-të dhe po zhvillohen çdo mbrëmje në kryeqytet, ndërsa tubime mbështetëse janë raportuar edhe nga diaspora shqiptare në disa vende të Europës dhe Amerikës së Veriut.
