Protesta kundër qeverisë ka vijuar edhe në ditën e saj të 15-të, me mijëra qytetarë që kanë marshuar në rrugët kryesore të Tiranës duke kërkuar dorëheqjen e kryeministrit Edi Rama dhe largimin e kabinetit qeveritar.
Sipas organizatorëve, kolona e protestuesve është shtrirë përgjatë disa prej akseve më të rëndësishme të kryeqytetit, duke përfshirë Rrugën e Durrësit, zonën pranë Pallatit të Sportit “Asllan Rusi” dhe Laprakën.
Gjatë marshimit janë dëgjuar thirrje kundër qeverisë dhe slogane që kërkojnë ndryshim politik. Protestuesit kanë vijuar itinerarin e tyre në grupime të mëdha, duke bllokuar përkohësisht qarkullimin në disa segmente rrugore.
Organizatorët pretendojnë se pjesëmarrja ka qenë ndër më të lartat e këtyre javëve, ndërsa nga pamjet e publikuara në rrjetet sociale duket një numër i konsiderueshëm pjesëmarrësish përgjatë itinerarit të protestës.
Deri në mbyllje të marshimit nuk janë raportuar incidente serioze, ndërsa forcat e policisë kanë monitoruar zhvillimin e aktivitetit dhe menaxhimin e trafikut në zonat e prekura.
