Protesta qytetare para godinës së Kryeministrisë ka vijuar edhe këtë të shtunë, duke shënuar ditën e 14-të radhazi të mobilizimit kundër qeverisë.
Qytetarë të shumtë u mblodhën në qendër të Tiranës, ku përsëritën kërkesat e tyre për ndryshim politik dhe mbajtën pankarta me mesazhe kundër kryeministrit Edi Rama, por edhe ndaj figurave të tjera politike.
Ashtu si në protestat e mëparshme, pjesëmarrësit shpalosën flamuj kombëtarë dhe pankarta me slogane të ndryshme, ndërsa gjatë mbrëmjes u dëgjuan vazhdimisht thirrje kundër qeverisë dhe klasës politike.
Një nga momentet simbolike të protestës ishte ndezja e flakadanëve në mes të turmës, një veprim që është përsëritur edhe në tubimet e ditëve të kaluara. Drita e flakadanëve shoqëroi protestuesit gjatë marshimit dhe qëndrimit të tyre në qendër të kryeqytetit.
Protesta e kësaj të shtune u zhvillua në një atmosferë të ngarkuar emocionalisht, me pjesëmarrjen e qytetarëve të ardhur nga zona të ndryshme të vendit, si dhe të përfaqësuesve të diasporës shqiptare.
Organizatorët deklaruan se aksioni qytetar do të vijojë edhe në ditët në vazhdim, ndërsa kërkesat kryesore mbeten të lidhura me dorëheqjen e qeverisë, reforma politike dhe ndryshime në mënyrën e funksionimit të institucioneve shtetërore.
Pas përfundimit të tubimit para Kryeministrisë, protestuesit vijuan marshimin në rrugët e Tiranës, duke e kthyer mbrëmjen në një tjetër demonstrim të gjerë qytetar në zemër të kryeqytetit.
