Situata është tensionuar paraditen e së shtunës në zonën e Rrjollit, ku banorët vijojnë protestat kundër ndërtimit të një resorti turistik që sipas tyre po realizohet mbi toka që ata i konsiderojnë pronë të komunitetit lokal.
Dhjetëra banorë u mblodhën pranë kantierit të ndërtimit, duke kundërshtuar punimet dhe duke kërkuar ndërprerjen e menjëhershme të projektit. Gjatë protestës pati përplasje verbale dhe fizike me efektivët e Policisë së Shtetit, të cilët ishin vendosur në zonë për të garantuar sigurinë dhe mbarëvajtjen e situatës.
Mes tensioneve, një grup protestuesish arriti të shembë një pjesë të rrethimit me kangjella që rrethon kantierin e ndërtimit. Banorët pretenduan se barriera ishte vendosur në mënyrë të padrejtë dhe se po u kufizonte aksesin në zonat që ata i konsiderojnë pronë të tyre.
Gjatë manifestimit u dëgjuan thirrje kundër klasës politike në vend. Protestuesit brohoritën në mënyrë të përsëritur: “Rama në burg, Berisha në burg”, duke shprehur pakënaqësinë ndaj të gjithë spektrit politik.
Një pjesë e protestuesve tentuan gjithashtu të ndalonin makineritë që po kryejnë punimet në terren, ndërsa forcat e policisë ndërhynë për të shmangur përshkallëzimin e situatës dhe për të larguar protestuesit nga zona e kantierit.
Banorët mbanin pankarta me mesazhe kundërshtuese ndaj projektit, ku spikaste slogani: “Jemi fëmijët e Rrjollit, toka nuk preket!”. Ata deklaruan se do të vijojnë protestat deri në pezullimin e plotë të punimeve dhe kërkuan ndërhyrjen e institucioneve shtetërore për të shqyrtuar pretendimet e tyre mbi pronësinë e tokave.
Nga ana tjetër, autoritetet nuk kanë dhënë ende një reagim të detajuar mbi incidentet e ndodhura gjatë protestës, ndërsa situata në zonë mbetet nën monitorimin e forcave të rendit.
Protestat në Rrjoll janë pjesë e kundërshtimeve që prej javësh po zhvillohen në veri të vendit kundër projekteve të mëdha turistike, ku banorët dhe aktivistët kërkojnë më shumë transparencë mbi pronësinë e tokave, ndikimin në mjedis dhe përfitimet që këto investime do të sjellin për komunitetin lokal.
