Kryeministri Edi Rama ka anuluar pjesëmarrjen e tij në aktivitetin e organizuar për 35-vjetorin e Partisë Socialiste në Gjirokastër, një ngjarje që ishte parashikuar të zhvillohej pasditen e së shtunës.
Sipas informacioneve të raportuara nga mediat, përgatitjet për organizimin e aktivitetit kishin nisur që në orët e para të mëngjesit. Në ambientin ku do të mbahej ceremonia ishin vendosur karriget, ishte përgatitur skena dhe ishte realizuar dekori për pritjen e kryeministrit dhe drejtuesve të tjerë të partisë.
Megjithatë, pjesëmarrja e Ramës në këtë aktivitet u anulua në minutat e fundit, pa një njoftim publik mbi arsyet e ndryshimit të axhendës.
Festimet për 35-vjetorin e Partisë Socialiste në Gjirokastër u zhvilluan nën drejtimin e ministres Mirela Kumbaro, në cilësinë e drejtueses politike të qarkut, si dhe të Sekretarit të Përgjithshëm të PS-së, Blendi Klosi.
Mungesa e kryeministrit në këtë aktivitet ka tërhequr vëmendjen e opinionit publik, veçanërisht në një periudhë kur vendi po përjeton një klimë të tensionuar politike, me protesta të zhvilluara në Tiranë dhe qytete të tjera të vendit.
Ndërkohë, Partia Socialiste vijon aktivitetet përkujtimore me rastin e 35-vjetorit të themelimit të saj, ndërsa drejtuesit e mazhorancës kanë theksuar rëndësinë e kësaj date në historinë politike të vendit.
